A visita ao parque arqueolóxico inclúe o acceso a tres espazos diferentes. A exposición permanente, situada no Centro de Interpretación e Documentación, a área arqueolóxica en si, na que destacan conxuntos como Laxe dos Carballos, Outeiro dos Cogoludos ou Laxe da Forneiriña, e a reconstrución dun poboado do Bronce Final.

Este conxunto artístico incorporouse recentemente ao patrimonio cultural europeo a través do Itinerario Cultural Europeo, CARP, Camiños de Arte Rupestre Prehistórica, asociación amparada polo Consello de Europa que agrupa practicamente a todos os grandes destinos turísticos europeos baseados na prehistoria.

O mosteiro é unha xoia do románico da provincia de Pontevedra. Fundouse no século XII; os primeiros monxes que chegaron foron bieitos e, entre os séculos XII e XIII, engadiuse a Orde do Císter. Por iso a súa arquitectura non segue estritamente o estilo cisterciense. É un do sete primeiros mosteiros que existiron na diocese de Compostela.

Monumento megalítico formado por unha gran pedra alongada e fincada verticalmente no chan. Presenta gravados en forma de cazoletas e serpentiformes. A súa función delimitadora estaría relacionada na prehistoria con elementos funerarios, rituais ou espaciais, xa que nos seus arredores conflúen diferentes liñas naturais de tránsito.

O motivo principal deste conxunto de petróglifos é a figura dun gran cervo macho, probablemente a maior de toda a arte rupestre galega, representado en posición parada, coa cabeza ergueita e a boca aberta coma se estivese a emitir o característico son da brama. Hai unha ruta que une este petróglifo co Castro de Penalba.

O curro de Sabucedo acolle no mes de xullo a celebración da Rapa das Bestas, que ten a finalidade de levar a cabo as tarefas de desparasitación interna dos animais, mellorando as condicións hixiénico-sanitarias dos cabalos salvaxes. O curro é o recinto onde se leva a cabo a rapa.