Na Idade Media, este enclave foi un dos fortes máis importantes de Galicia. Controlaba o tránsito fluvial do río Ulla e foi clave na defensa da cidade compostelá. Actualmente consérvanse os restos de dúas torres e mais a capela. Nos seus arredores, de gran beleza paisaxística, rememóranse acontecementos vividos co desembarco viquingo o primeiro domingo de agosto.

É unha antiga explotación de arxila a ceo aberto destinada á fabricación de ladrillo e reconvertida en lagoa. Dispón dun pantalán flotante e todo o seu perímetro está acondicionado para dar longos paseos e gozar da natureza e tranquilidade do lugar. Forma parte do Ecomuseo de Valga, integrado por unha rede de lugares de interese natural da que tamén forman parte as fervenzas do río Valga, o monte Beiro e a praia fluvial de Vilarello.

A contorna conta con numerosas rutas e miradoiros que permiten coñecer todo o seu patrimonio histórico-paisaxístico. É o punto máis elevado da comarca do Salnés, dende onde podemos gozar dunha vista panorámica da ría de Arousa e as súas bateas.

No cume do monte Abalo atópanse os muíños de vento construídos a finais do século XIX, únicos en Europa polo seu dobre sistema de aspas. O lugar en que están ofrece unhas espectaculares vistas da ría de Arousa e da desembocadura do río Ulla, así como da Lagoa de Pedras Miúdas.

Templo de orixe barroca con profundas reformas neoclásicas no século XIX como, por exemplo, a súa fachada. O campanario actual é aínda máis recente, xa que se construíu en 1910. No entanto, Setecoros constitúe un rexistro do paso do tempo dende o período denominado tardorromano ata o día de hoxe. Nos arredores da igrexa, podemos descubrir un fermoso e importante oliveiral con máis de 800 oliveiras.