Ao pé dun parque natural

O xacemento sitúase no interior do monte Aloia, o primeiro Parque Natural de Galicia. A paisaxe deste parque é o resultado duna exótica repoboación realizada hai 100 anos con vexetación autóctona e outras especies como cipreses, abetos e cedros do Líbano.

O nome Alto dos Cubos fai referencia ao montículo sobre o cal se sitúan as estruturas circulares do seu cumio. Tamén é coñecido como Cabeza de Francos debido á existencia dun asentamento galo en época de Napoleón Bonaparte.

O poboado, habitado dende o século II a.n.e. ata o século III, está estruturado en dous niveis; un formado por un recinto superior delimitado por unha muralla e outro na pendente noroeste. Os seus habitantes vivirían da agricultura e a gandería, xunto con actividades manufactureiras como o curtido de peles ou a fabricación de utensilios de pedra, bronce, madeira e ferro.

Varias vivendas foron escavadas e parcialmente reconstruídas, e dúas delas conservan o vestíbulo.

A localización estratéxica do xacemento nun lugar elevado ofrece un vasto dominio visual; pódense ver os vales do Miño e do Louro, a foz do Miño e Portugal.